Эрон парламент спикери музокаралар учун Туркияга сафар қилди
Эроннинг махфий сиёсий тизимида Ларижоний жаноблари катта аҳамиятга эга экани айтилади
Эрон парламенти спикери Али Ларижоний ўзаро таранглашиб бораётган алоқалар манзарасида Туркияга келган.
Туркия раҳбарлари Теҳроннинг минтақадаги энг асосий иттифоқчиси бўлмиш Сурия ҳукуматининг аксил-ҳукумат намойишларини зўравонлик билан бостиришини қаттиқ қоралаганлар.
Эрон, шунингдек, Туркиянинг НАТО аксил-ракета мудофаа тизимининг бир қисмига макон бериш қароридан норози.
Ой бошида Туркия Эроннинг ядровий дастури борасидаги халқаро музокараларнинг қайта бошланишига чақирган.
Томонлар бир йил аввал Истанбулда учрашганидан бери ҳеч қандай музокара ўтказилмаган.
Ноқулай қўшничилик
Би-би-сининг Истанбулдаги мухбири Жонатан Ҳеднинг айтишича, жаноб Ларижоний Эроннинг сиёсий тизимидаги энг нуфузли ўйинчиларидан, шундай экан унинг Туркияга сафари катта аҳамиятга эга.
Собиқ ядровий музокарачи сифатида жаноб Ларижоний Эроннинг Ғарб билан музокараларни қайта бошлаш истаги борасида Туркия расмийларига кўпроқ маълумот бериши мумкин.
Икки қўшни мамлакат, шунингдек, АҚШ қўшинлари чиқиб кетиши ортидан Ироқ борасида ҳам келишиб олишлари мумкин. Улар Ироқда рақиб ҳисобланадилар, лекин ёмонлашиб бораётган вазиятда улар ҳамкорлик қилишлари мумкин.
Туркиянинг Сурия ҳукуматига қарши адовати ва НАТО аксил-ракета тизимига мезбонлик қилиш режаси Эроннинг ғазабини қўзғатган, лекин охирги пайтларда Эрон расмийлари Туркия сиёсати борасидаги танқидларини бироз юмшатганлар.
Ўз навбатида, Туркия энергия заҳиралари учун Эронга таяниб қолган - АҚШнинг қаршилигига қарамай, Туркия ўзидаги нефтнинг 30 фоизини Эрондан сотиб олади.
Мухбиримизга кўра, Туркия ва Эрон ўртасидаги муносабатлар ҳар доим ноқулай бўлиб қолади ва ўтган бир йил ичида араб дунёсида юз берган талотўплар бу фарқларни янада катталаштириб кўрсатди. Бироқ, Эрон ҳам, Туркия ҳам охирги йилларда шаклланган ўзаро ишончни қўлдан бой беришни истамайди.
Сайфуллох: АҚШни Эронга қилаётган босимлари натижа берган кўринади.
Масала шундаки, Эрон АҚШ билан Туркия орқали алоқаларини тиклашга уринмоқдами, ёки АҚШни ифлос режаларини, яъни сунийлар билан шийалар ўрталаридаги кескинликни кучайтираётганига қарши хамкорлик қилишга чақирмоқчими.
Иккала холатда хам, Туркия Эронни дунё халқаро вазийяти диққат марказида туриб қолган муаммоларини ечишдаги ўртакашлик қилиб бера оладиган давлат деб, нафақат Эрон балки Араб режимлари хатто АҚШ томонидан хам тан олиниши кутилмоқда.
Эрон хохлаётган музокаралар эса, энди АҚШ манфаатлари томон ечилиши аниқ. Негаки музокара томонига биринчи қадам Эрон томонидан ташланди.
Лекин АҚШ яқин шарқда нимани хохлайди, масала шу ерда.
