Қозоғистонлик жангарилар: ‘Муҳаммад бизнинг одам...’
Муҳаммад Мераҳ уюштирган ҳужум ортидан Францияда 19 киши "Салафийлик" оқимига алоқадорликда гумон этилиб, ҳибсга ҳам олинишганди
Қозоғистонда фаолият юритувчи "Жунд ал-Халифат” исломий гуруҳи француз ҳарбийларининг ўлдирилиши ва Франциянинг Тулуз шаҳридаги яҳудий мактабига уюштирилган ҳужумга масъулиятни ўз зиммасига олган.
Муҳаммад Мераҳ Тулуздаги яҳудий мактабига уюштирган ҳужумидан бир неча кун ўтиб, Франция махсус кучлари томонидан ўлдирилган
Қозоғистонда "Халифалик аскарлари” фаолияти тақиқланган террорчи ташкилот саналади.
Мамлакат ҳуқуқ-тартибот идораларига кўра, гуруҳ 2011 йилда уч нафар фуқаролари томонидан Қозоғистонда "жиҳод олиб бориш” мақсадида тузилган.
Экспертларнинг айрим фаразларига кўра, "Халифалик аскарлари” Афғонистон ҳудудидан туриб фаолият олиб боради.
Бошқа бир тахминларда эса, гуруҳнинг Қозоғистоннинг ўзида яширинча иш юритиши айтилади.
"Жунд ал-Халифат” илк бор ўтган йил куз ойларида тилга тушган.
Гуруҳ давлат ташкилотларида намоз ўқишни ҳам тақиқловчи Дин тўғрисидаги янги қонун қабул қилинишидан қисқа вақт ўтмай Атирау шаҳрида амалга оширилган иккита портлашга масъулиятни ўз зиммасига олиб чиқади.
Мухбиримизнинг айтишича, Қозоғистон ҳукумати унгача бу каби хавфга ҳеч қачон рўбарў келмаган.
"Халифалик аскарлари” ўтган йил декабр ойида Олма-ота яқинидаги Боралдай қишлоғида кечган отишмаларга ҳам масъулиятни ўз зиммасига олганди.
Шу йилнинг 26 март куни 47 нафар судланувчи "террорчилик”, "террорчиликни тарғиб этиш”, "террорчи гуруҳ тузиш, унга бошчилик қилиш ва фаолиятида иштирок этиш”, яна шунингдек, "экстремистик ёки террорчилик фаолиятини молиялаш” айблари билан Атирау маҳкамаси қаршисида ҳозир бўлишди.
Масъуллар уларни "Жунд ал-Халифат” сафдошлари сифатида кўришади.
Маҳкама жараёнининг ўзи эса, ёпиқ тартибда кечмоқда.
Франциялик ҳужумчи Муҳаммад Мераҳ эса, бундан ўн кунча бурун мамлакат махсус кучлари томонидан Тулуз шаҳрида ўлдирилганди.
Туркистон: Қозоғистондаги исломий жангари кучлар обрўйини дунё дангалига кўтаришга уринишдан мақсад нима бўлиши мумкин?
Бу маълумот албатта аввалида кулгили кўриниши мумкин. Негаки Қозоқ давлатини ўзи бош бўлиб "жунд ал халифат" уюшмасига ёрдам бергани тақдирида хам, бир йил ичида улар бунчалик мувоффаққийятга эришишлари ақилга сиғиши ўта қийин албатта.
Лекин масалани муаммоси бу ерда эмас. Балки эътибор қаратишимиз лозим бўлган томон шундаки: Қозоғистондаги холатни, Исломий қувватлар портлаб кетиши мумкин даражадаги ўта вахимали қилиб ва хатто ундаги бу кучайиб бораётган хавф, нафақат Қозоғистонга, балки бутун дунёга тахдид солаётгандек кўрсатишга уринилмоқда.