Президент Каримов: 'Америка Афғонистондан чиқиб кетгач, таҳдид янада кучаяди '

Президент Каримов Ўзбекистон ўз армиясини мустаҳкамлашини айтган
Ўзбекистон Президенти Ислом Каримов 2014 йилда АҚШ қўшинлари Афғонистондан олиб чиқиб кетилганидан сўнг Марказий Осиёга таҳдид янада кучайишини айтган.
Ўзбекистон Қуролли Кучлари ташкил этилганининг 20 йиллик санаси муносабати билан табригида жаноб Каримов Афғонистондаги "террорчилик ва экстремистик фаолиятнинг кенгайиш хавфи кучайиши" ҳамда Марказий Осиёда доимий беқарорлик ўчоғининг юзага келиш хавфидан огоҳлантирган.
Унинг сўзларига кўра, сўнгги пайтларда Марказий Осиё минтақаси ўзининг улкан табиий бойликлари сабаб йирик давлатларнинг стратегик манфаатлари тўқнашадиган ҳудудга айланган.
Жаноб Каримовга кўра, минтақадаги зиддиятлар манзарасида Ўзбекистон ўз армиясини мустаҳкамлайди ва ҳарбий тайёргарликни кучайтиради.
Ўзбекистон раҳбарига кўра, Марказий Осиёда урушлар эҳтимоли катта.
"Минтақамизда юз бериши мумкин бўлган жанговар ҳаракатлар театри шароитида тажриба тўплашни янада ошириш, замонавий ҳарбий операциялар ўтказишнинг асосий тамойил ва усулларига оид билимларни такомиллаштириш... замонавий ва юқори даражадаги аниқлик билан зарба берадиган қурол-яроғларни қўллаш асосларини пухта эгаллашга асосий эътибор қаратиш зарур",- деган Президент Каримов.
Ижтимоий норозиликлар
Жаноб Каримов шунингдек, "минтақанинг алоҳида давлатларида ижтимоий-иқтисодий вазиятнинг ёмонлашгани" минтақавий хавфсизликка жиддий таҳдид солаётганини айтган.
"Минтақада жойлашган айрим мамлакатлардаги ижтимоий норозиликнинг кучайиши... ёмонлашиб бораётган ижтимоий-иқтисодий вазият минтақавий барқарорлик ва хавфсизликка қарши жиддий таҳдид бўлиб қолмоқда", - деб айтган Президент Каримов, аммо аниқ давлат номини атамаган.
Президент Ўзбекистоннинг ўзидаги ижтимоий-иқтисодий аҳвол ҳақида лом-мим демаган, аммо ҳарбийларга яхши шароитлар яратилганини таъкидлаган.
Ўзбекистон армияси минтақада нисбатан жанг қилишга қодир армия сифатида кўрилади.
Аммо шу билан бирга, мутахассисларга кўра, ҳукумат амалга оширган ҳарбий ислоҳотлар коррупция ва "дедовшина"ни енга олмаган.

Сайфуллох: Хатто Каримов ҳам очиқчасига, давлатни тинчлигини бузиши мумкин бўлган асосий қувват АҚШ эканлигини тан олмоқда.
Каримовни баёнотидан, у Сурия ёки Ливия вариянтини танлаганлигини таъкидлаб, қўзғалиши кутилаётган ўзбек халқига қарши куролланишни кучайтирмоқчи эканлигини айтмоқда.
Уни хозирда хотиржам қилиб турган холат, АҚШ уни вақтинча ўз химоясида ушлаб турганлигига ва у иложи борича Ўзбекистонда базалар пайдо қилиб қолиб кетиши кераклигига хам далолат қилмоқда.
Бу "дўстларингни ўзингга яқин тут, душманларни ундан хам яқинроқ" деган нақл асосида иш кўришга далолат қилади.

Туркистон.